মাখিবাহা সভা মহোৎসৱ

নলবাৰী জিলাৰ পশ্চিম অংশত অৱস্থিত এখন ঐতিহ্যমণ্ডিত গাঁও হৈছে মাখিবাহা। এই গাঁওখনে কেৱল শিক্ষাগত আৰু সাংস্কৃতিক দিশত আগবঢ়া এখন আদৰ্শ গাঁও হিচাপেই পৰিচিত নহয়, বৰঞ্চ প্ৰতি বছৰে অনুষ্ঠিত হোৱা ইয়াৰ সভা মহোৎসৱৰ বাবে সমগ্ৰ অসমতে ই এক সুকীয়া স্থান লাভ কৰিছে। 

এই মহোৎসৱ কেৱল এটা ধৰ্মীয় অনুষ্ঠান নহয়, ই অসমীয়া সংস্কৃতি, ঐক্য আৰু সম্প্ৰীতিৰ এক বৰ্ণিল প্ৰতিচ্ছবি।মাখিবাহা সভা মহোৎসৱৰ ইতিহাস অতি প্ৰাচীন আৰু গৌৰৱোজ্জ্বল। জনশ্ৰুতি আৰু তথ্য অনুসৰি, মাখিবাহা গাঁৱৰ সমাজ সংস্কাৰক গৌৰীনাৰায়ণ চৌধুৰীয়ে প্ৰথমে এই সভাৰ সূচনা কৰিছিল। তেওঁ ধৰ্মীয় আৰু সামাজিক দায়বদ্ধতাৰে এই অনুষ্ঠানটো পোনপ্ৰথমে ফাগুন মাহৰ শুক্লা প্ৰতিপদ তিথিত আৰম্ভ কৰিছিল। সেই সময়ৰ পৰাই এই তিথিটোকে আধাৰ হিচাপে লৈ মাখিবাহাবাসী ৰাইজে বছৰৰ অন্তত এই পৱিত্ৰ মহোৎসৱ পালন কৰি আহিছে। এই সভাৰ যোগেদিয়েই অঞ্চলটোত আধ্যাত্মিক চিন্তা-চৰ্চাৰ বিকাশ হৈছিল। আনকি ব্যৱসায়িক উদ্দেশ্যত ভূটানৰ পৰা মানুহো এই সভালৈ আহিছিল বুলি জনা যায়। বৰ্তমান ভূটানৰ লোকৰ আগমন কমিলেও, উত্তৰ-পূৰ্বাঞ্চলৰ বিভিন্ন প্ৰান্তৰ পৰা হাজাৰ হাজাৰ ভক্ত, দৰ্শনাৰ্থী আৰু ব্যৱসায়ীৰ সমাগমে এই মহোৎসৱক এক বিশাল ৰূপ দিছে।

মাখিবাহা সভা মহোৎসৱৰ আটাইতকৈ উল্লেখনীয় দিশটো হ'ল ইয়াৰ প্ৰস্তুতি। এই প্ৰস্তুতিয়েই গাঁৱৰ লোকসকলৰ মাজত থকা অটুট ঐক্য আৰু সামূহিক সহযোগিতাক প্ৰতিফলিত কৰে। সভা আৰম্ভ হোৱাৰ কিছু দিন পূৰ্বে, গাঁৱৰ ৰাইজ সমবেত হৈ এখন সাধাৰণ সভা পাতে। এই সভাতে "সভা পৰিচালনা সমিতি" গঠন কৰা হয়। এই সাধাৰণ সভাৰ বাবে কোনো আনুষ্ঠানিক জাননীৰ প্ৰয়োজন নহয়‌ ৰাইজ নিজেই আগ্ৰহেৰে উপস্থিত হয়। সভাৰ আগৰ পঞ্চমী তিথিত দিনত সমূহ ৰাইজ একেলগ হৈ সভাৰ খলাত ৰভা সাজে। এই ৰভা সজাত বাঁহ, কলপাত,  আৰু টকৌপাতৰ ব্যৱহাৰ এক পৰম্পৰা। সমূহীয়া প্ৰচেষ্টাৰে সজা এই ৰভাৰ তলতে গোটেই গাঁৱৰ মংগলৰ বাবে ৰাইজে আশীৰ্বাদ লয় বুলি বিশ্বাস কৰা হয়। এই প্ৰস্তুতিৰ দিনবোৰে দেখুৱায় যে মাখিবাহা সভা মহোৎসৱ কোনো ব্যক্তিগত অনুষ্ঠান নহয়, এয়া সম্পূৰ্ণৰূপে সমূহ ৰাইজৰ সহযোগ আৰু আস্থাৰ ফচল।

ফাগুন মাহৰ শুক্লা প্ৰতিপদ তিথিত আৰম্ভ হোৱা এই মহোৎসৱত প্ৰতিদিনে পুৱাৰে পৰা নাম-কীৰ্তন, ভাগৱত পাঠ, হোম-যজ্ঞ আদি ধৰ্মীয় ৰীতি-নীতিৰে পৰিৱেশ পৱিত্ৰ হৈ পৰে। মণিকূটৰ গাতে লাগি থকা সভাঘৰত ব্ৰাহ্মণসকলে পূজা-পাতল আৰু হোম-যজ্ঞ অনুষ্ঠিত কৰে, য'ত ভক্তসকলে একান্ত মনে অংশগ্ৰহণ কৰে। হোমৰ স্থানৰ দক্ষিণে ভাগৱত পাঠ আৰু পশ্চিমে নাম-প্ৰসংগ চলে। এই আধ্যাত্মিক কাৰ্যসূচীসমূহে অঞ্চলটোৰ লোকসকলৰ মনত শান্তি আৰু ভক্তিৰ ভাব জগায় তোলে। এই মহোৎসৱে মানুহক ধৰ্মীয় জীৱন যাপন কৰিবলৈ আৰু সৎ পথেৰে আগবাঢ়িবলৈ প্ৰেৰণা যোগায়।

মাখিবাহা গাঁওখনে অকল আধ্যাত্মিকতাতেই নহয়, অসমীয়া কলা-সংস্কৃতিৰ বিভিন্ন ক্ষেত্ৰতো নিজৰ সুকীয়া পৰিচয় বজাই ৰাখিছে। সভা মহোৎসৱৰ সময়ছোৱাত এই সাংস্কৃতিক ঐতিহ্যৰ বৰ্ণিল সমাহাৰ ঘটে।মহোৎসৱত গাঁৱৰ পৰম্পৰাগত কলাসূলভ পৰিৱেশনা যেনে: ওজাপালি,  পুতলা নাচ,  নাগাৰানাম, সংকীৰ্তন, নাট্যকলা আদিৰ প্ৰদৰ্শন কৰা হয়। এইবোৰে নতুন প্ৰজন্মক নিজৰ মূল সংস্কৃতিৰ সৈতে পৰিচিত কৰোৱাৰ উপৰিও হেৰাই যাব খোজা লোক-কলাসমূহক সঞ্জীৱিত কৰি ৰাখে।ইয়াৰ উপৰিও আধুনিক সাংস্কৃতিক অনুষ্ঠান, ভ্ৰাম্যমাণ থিয়েটাৰৰ নাটক আৰু বিশিষ্ট শিল্পীসকলৰ দ্বাৰা সংগীতানুষ্ঠানো অনুষ্ঠিত হয়। এইসমূহে সকলো বয়সৰ দৰ্শনাৰ্থীকে আকৰ্ষণ কৰে আৰু মহোৎসৱৰ মাদকতা বৃদ্ধি কৰে।

মাখিবাহা সভা মহোৎসৱৰ সামাজিক আৰু অৰ্থনৈতিক প্ৰভাৱো অতি গুৰুত্বপূৰ্ণ।এই মহোৎসৱে বিভিন্ন জাতি-ধৰ্মৰ লোকৰ মাজত ভাতৃত্ববোধ আৰু সমন্বয় গঢ়ি তোলাত সহায় কৰে। হাজাৰ হাজাৰ লোকৰ সমাগমে গাঁৱখনত এক উছাহ আৰু প্ৰফুল্লতাৰ পৰিৱেশ সৃষ্টি কৰে, যিয়ে সমাজত শান্তি আৰু আনন্দ বিয়পাই।সভা মহোৎসৱ উপলক্ষে বিশাল মেলা বহি পৰে। এই মেলাত নিত্য প্ৰয়োজনীয় সামগ্ৰীৰ পৰা আৰম্ভ কৰি শিল্পকলা, হাতে বোৱা কাপোৰ, খেল-ধেমালিৰ সামগ্ৰী আৰু বিভিন্ন ব্যঞ্জনৰ দোকান দেখা যায়। এই মেলাই স্থানীয় উদ্যোগীসকলক এক বৃহৎ বজাৰ প্ৰদান কৰে আৰু অৰ্থনৈতিক গতিশীলতা আনে। ই গ্ৰাম্য অৰ্থনীতিত এক গুৰুত্বপূৰ্ণ ভূমিকা পালন কৰে।

মাখিবাহা সভা মহোৎসৱ কেৱল এটা বাৰ্ষিক উদযাপন নহয়,ই মাখিবাহাবাসীৰ আত্মা, তেওঁলোকৰ পৰম্পৰা আৰু অবিচল আস্থাৰ প্ৰতিচ্ছবি। ধৰ্মীয় ৰীতি-নীতি, সাংস্কৃতিক প্ৰদৰ্শন আৰু সামাজিক বান্ধোনৰ এই তিনিটা সুঁতিয়ে মহোৎসৱটোক এক অনন্য মাত্ৰা প্ৰদান কৰিছে। বছৰটোৰ এই সময়ছোৱাত সমগ্ৰ অঞ্চলটো এক নতুন উদ্দীপনাৰে জীপাল হৈ পৰে।

এই মহোৎসৱে আমাক সোঁৱৰাই দিয়ে যে ঐতিহ্য, সংস্কৃতি আৰু ঐক্য—এইবোৰেই হৈছে আমাৰ সমাজৰ প্ৰকৃত শক্তি। 

বৰষা ঠাকুৰীয়া 

যোগাযোগ আৰু সাংবাদিকতা বিভাগ, 

গুৱাহাটী বিশ্ববিদ্যালয়